Rimi

Il-wirja "Rimi" tesplora l-kwistjoni tal-iskart fl-Ewropa minn perspettiva storika, permezz ta' erba' taqsimiet: Smajtek tgħid "żibel"? Minn użu mill-ġdid għal skart (1800 – 1945), Ewropa Li Tarmi (1945 – illum), Ngħixu bl-iskart (jew mingħajru).

Il-pjattaforma online ta' "Rimi" tifrex aktar is-suġġett tal-iskart minn perspettiva tranżnazzjonali u transdixxiplinari. Il-viżitaturi tal-wirja jistgħu jfittxu, jiskopru u jaqsmu l-abbundanza ta' kontenut awdjoviżiv u miktub kokurat minn għaxar mużewijiet Ewropej.

Il-kontenut tal-proġett "Rimi" u l-attivitajiet tiegħu huma riżultat ta' kontribuzzjoni kkombinata f'diversi komunitajiet, inklużi dawk involuti direttament fil-ġbir, ir-riċiklaġġ, l-użu mill-ġdid u t-tnaqqis tal-iskart fi Brussell.

Il-proġett "Rimi" joffri diversi possibbiltajiet ta' tagħlim li jinkludu approċċ għall-udjenza ċċentrat fuq il-viżitaturi, flimkien ma' workshops fl-iskejjel, elementi interattivi, u programm ta' avvenimenti li jinvolvi l-udjenzi.

Din il-pubblikazzjoni tagħti leħen lil dawk li ħadmu wara l-kwinti tal-proġett: minn kuraturi u edukaturi tal-mużewijiet għad-disinjaturi tal-wirja, kif ukoll esperti lokali veri dwar l-iskart. L-akkademiċi jiddeskrivu kif iħarsu lejn l-iskart mil-lentijiet tal-istorja, l-arkeoloġija, is-soċjoloġija, l-antropoloġija u l-arti.

L-iskart huwa ta' natura sorprendenti u waħda li tinbidel. Għaliex narmu l-affarijiet? L-iskart iservi bħala evidenza storika prezzjuża, minħabba li huwa mera tas-soċjetà u tagħna stess.

L-arkeologi skavaw dan il-flixkun apparentement normali f'kampijiet qrib il-Valle de los Caídos fi Spanja. Kien fih il-"Glefina", ġulepp użat fil-ġlieda kontra l-malnutrizzjoni. Huwa maħsub li l-flixkun kien jappartjeni għall-ħaddiema li bnew il-monument li jonora lid-dittatur Francisco Franco. Dan il-flixkun huwa prova taċ-ċirkostanzi diffiċli li kellhom iħabbtu wiċċhom magħhom il-ħaddiema u l-familji tagħhom, storja li rarament ġiet irrakkontata qabel.

Fis-seklu 19, li wieħed iqalleb fiż-żibel biex isib materjali ta' valur kien mod komuni kif wieħed jaqla' l-ħobża ta' kuljum. Anke t-tfal saru l-hekk imsejħa "ragpickers", li jiġbru t-tessuti u materjali oħra biex ibiegħuhom. Dan kien xogħol riskjuż, peress li dawn ir-"ragpickers" kienu jiġu f'kuntatt ma' oġġetti maħmuġin li kienu ta' riskju serju għal saħħithom. 

Is-seklu 19 kien definit minn bidla tremenda fil-kultura industrijali. Madankollu, kienet prattika standard li l-oġġetti jintużaw u jiġu pproċessati mill-ġdid. Anke l-eskrement kien riżorsa prezzjuża. Dan it-"toilet niexef" kien maħsub bħala alternattiva għal-lokijiet li kienu qed isiru dejjem aktar popolari, bil-ħamrija jew l-irmied jgħattu l-eskrement fil-barmil wara l-użu. Kellu l-għan li jiffranka l-ilma, jevita li jniġġes ix-xmajjar u jippreserva l-eskrementi tal-bniedem għall-użu bħala fertilizzant agrikolu.

Fi tmiem is-seklu, proċessi ġodda ta' produzzjoni, żieda fl-ammont ta' skart u l-moviment tal-iġjene wasslu biex l-iskart jitqies bħala xi ħaġa maħmuġa li għandha tintrema.

L-iskart jista' jkun perikoluż

Fil-bidu tas-seklu, il-modi kif inħarsu lejn l-iskart inbidlu. L-iskart issa kien meqjus bħala maħmuġ u li jagħmel ħsara, aktar milli riżorsa utli. Il-ġestjoni tal-iskart muniċipali sar kwistjoni urġenti fis-seklu 20.

Nadattaw fi żminijiet ta' bżonn

Madankollu, id-drawwiet preċedenti tal-użu u l-ipproċessar mill-ġdid tal-materjali reġgħu tfaċċaw fi żminijiet ta' skarsezza, bħal gwerer. Dan seta' wassal għal xi kreazzjonijiet mhux tas-soltu. Dan l-elmu ġie abbandunat minn suldat Ġermaniż matul it-Tieni Gwerra Dinjija. In-nies tal-lokal Taljani salvawh u wweldjaw manku fuqu, u ttrasformawh f'oġġett li jsaħħan is-sodda, oġġett ta' lussu fi żminijiet tant diffiċli.

Il-produzzjoni tal-massa raħħset l-oġġetti u għamlithom aktar disponibbli u għalhekk oġġetti li jistgħu jintremew. L-iskart sar problema kbira fuq livell globali.

Ġieli qgħadt taħseb għalfejn l-affarijiet illum ma jdumux daqskemm kienu jdumu qabel? Xi oġġetti jafu jinkisru aktar malajr milli mistenni minħabba li l-manifattur ried hekk. Jekk dan il-kunċett ta' obsolexxenza ppjanata huwiex reali jew le, kien suġġett ta' diskussjoni għal ftit żmien mhux ħażin.

Il-plastik sar wieħed mill-agħar problemi ambjentali li qed inħabbtu wiċċna magħha llum. Dan ix-xogħol juri diversi oġġetti miġbura tal-plastik imdendla 'l barra mill-kosta ta' riżerva naturali ta' Yorkshire. Dan iż-żibel miġbur mill-baħar jinkludi ġugarelli, skart mediku u straws, u huwa konklużjoni loġika tad-drawwiet ta' stil ta' ħajja mibni fuq ir-rimi.

L-iskart li qed tipproduċi l-Ewropa jrid imur x'imkien u normalment jispiċċa fin-Nofsinhar Globali. L-artist Takadiwa għaqqad buttuni ta' keyboards ta' kompjuters mormija u għotjien tal-fliexken tal-PET biex joħloq il-bandiera taż-Żimbabwe. Il-ħidma tikkritika l-prattiki ta' rimi tal-ekonomiji kapitalisti.

Kif nistgħu aħna, bħala individwi u bħala soċjetà, nisfidaw l-akkumulazzjoni bla tmiem tal-iskart?

Fil-passat, bosta oġġetti kien jintirtu minn ġenerazzjoni għal oħra. It-tiswija kienet essenzjali. L-oġġetti kienu jintużaw sal-aħħar mument possibbli, sakemm l-ebda toqba ma setgħet tiġi meħjuta, l-ebda xaqq ma seta' jimtela u l-ebda magna ma setgħet tissewwa aktar.

Il-ġestjoni tal-iskart ma jfissirx li naqbdu u neħilsu minnu. Sabiex titwaqqaf l-akkumulazzjoni kostanti tal-iskart, l-użu mill-ġdid tal-oġġetti fil-pussess tagħna jaf ikun soluzzjoni. Jekk tanbur ta' magna tal-ħasil qadima jista' jerġa' jintuża bħala gradilja, allura kollox jista' jerġa' jintuża – jeħtiġlek biss tkun kreattiv!

L-iskart huwa xhud tal-impronta tagħna fuq id-dinja.

Anke meta jintrema, l-iskart isawwar l-ambjent tagħna. Xi drabi bi ftit, xi drabi b'ħafna aktar. Din il-miżbla għall-iskart radjuattiv fi Spanja turi kemm is-soċjetà għandha tagħti attenzjoni lill-iskart, jekk trid tittrattah kif suppost.

52 individwu u sitt organizzazzjonijiet fi Brussell iddiskutew is-suġġett tal-iskart magħna.

Sir af uħud min-nisa u l-irġiel li jżommu l-belt tagħna nadifa. Huma professjonisti tal-indafa pubblika li qasmu magħna l-għarfien u l-memorji tagħhom dwar l-iskart.

Tgħallem minn dawk in-nisa u l-irġiel li jsewwu jew li jsibu użu ġdid għal affarijiet li kieku jintremew. Huma voluntiera jew professjonisti li, meta jaqsmu l-esperjenza tagħhom, jgħinuna nħarsu lejn oġġetti u materjali minn angolu ieħor – jew saħansitra kif nagħtuhom ħajja mill-ġdid.

Kunu ispirati min-nisa u l-irġiel li jillimitaw l-ammont ta' skart li jipproduċu, xi drabi sal-punt li ma jiġġeneraw l-ebda skart. Huma persuni ordinarji li jiddeċiedu li jagħtu l-kontribut personali u individwali tagħhom għat-tnaqqis tal-produzzjoni globali tal-iskart.

Sir af min huma, aqra xi wħud mill-istejjer tagħhom jew sir af aktar dwar l-oġġetti li skoprejna permezz tagħhom: 

– fil-wirja temporanja fejn jintwerew l-oġġetti, flimkien ma' kwotazzjonijiet, testimonjanzi permezz tal-awdjo u l-vidjo;

– f'artiklu b'mużajk tar-ritratti tagħhom;

– fil-"bijografiji" tal-oġġetti ppubblikati fuq www.throwaway-project.eu u fil-pubblikazzjoni.

U ltaqgħu ma' xi wħud minnhom fl-avvenimenti organizzati f'Dar l-Istorja Ewropea!

Aktar minn 60 oġġett diġitizzat jirrakkontaw storja permezz ta' ritratti u testi, u jħeġġu lill-qarreja jirriflettu dwar dak kollu li hemm madwarhom. L-oġġetti tassew huma bla valur u jistgħu jintremew, jew tranżitorji u jistgħu jerġgħu jintużaw? Huma skart jew riżorsa? Il-kreattività, il-ħajja ta' kuljum u l-ambjent huma biss uħud mis-suġġetti li l-utenti jistgħu jagħżlu biex jinnavigaw il-pjattaforma.         

Tgħallem dwar ir-realtajiet lokali u l-komunitajiet relatati mal-iskart, permezz ta' filmati qosra ffilmjati fil-mużewijiet stess jew madwarhom. Il-kontenut interattiv minn madwar l-Ewropa jikkondividi għarfien siewi u jqajjem kuxjenza dwar l-impatt tal-iskart fuq il-madwar tagħna filwaqt li jipprovdi wkoll ħarsa kalejdoskopika dwar is-sinifikat tal-iskart tagħna llum.

Filwaqt li tibda mid-definizzjonijiet ta' x'inhu l-iskart – mogħtija minn persuni reali li huma esperti fil-ġestjoni u t-tnaqqis tal-iskart – din il-logħba tisfida lil min qed jilgħab jirrifletti dwar dak li jemmen fih u li mdorri jagħmel.

Il-pjattaforma online fiha blogposts, rapportaġġi ta' ritratti, avvenimenti b'xandir dirett u podcasts fuq varjetà ta' attivitajiet dwar il-kwistjoni tal-iskart, li seħħew matul il-proġett.  Din hija l-opportunità tiegħek biex tiltaqa' ma' Ewropej oħra u tgħinek tifhem aktar dwar l-iskart.

L-involviment ta' mużewijiet minn diversi partijiet tal-Ewropa, u esperti bi profili differenti, fil-kokreazzjoni tal-kontenut, ipprovda opportunità biex jiġi esplorat is-suġġett tal-iskart mill-perspettiva ta' dixxiplini differenti. Skopri min huma u fejn jinsabu.

L-involviment sinifikattiv tal-udjenza huwa mħeġġeġ permezz tal-interazzjoni tagħhom fil-wirja kif ukoll tal-pjattaforma online. Il-ħolqien ta' programm varjat jgħin biex jinħolqu interazzjonijiet bi skop mal-udjenza filwaqt li tiġi permessa l-aċċessibbiltà tal-kontenut, u jinbena fuq il-bżonn tan-nies li jirriżolvu l-kwistjonijiet dwar id-dinja li jgħixu fiha.

Il-programm jinkludi żjarat iggwidati, workshops fl-iskejjel, u avvenimenti festivi u akkademiċi dwar is-suġġett tal-iskart. Huwa spazju għall-udjenzi fi Brussell u madwar l-Ewropa biex jużaw il-format preferut tagħhom ta' stili ta' tagħlim filwaqt li jagħtu lin-nies l-opportunità li jsaqsu u fl-aħħar mill-aħħar jinfluwenzaw is-soċjetà permezz ta' ħsieb kritiku u azzjoni infurmata.

L-iskart jikxef. L-iskart huwa moħbi. L-iskart jinsab kullimkien! Min huma l-Ewropej tal-lum u mill-passat li semmgħu leħinhom biex jitolbu lill-kontemporanji tagħhom jibdlu d-drawwiet tagħhom relatati mal-produzzjoni tal-iskart? X'inhuma l-elementi li ġiegħlu lin-nies iqajmu kuxjenza pubblika dwar l-iskart? Mir-rivoluzzjoni industrijali sal-lum, dan il-workshop se jħeġġeġ lill-istudenti jiskopru u jiddiskutu l-bidliet kbar fil-mod kif l-Ewropej indirizzaw l-iskart matul l-istorja.

X'se jsalvana mill-kriżi tal-iskart? Soluzzjonijiet xjentifiċi rivoluzzjonarji, leġiżlazzjoni infurzata, movimenti kontra l-konsumeriżmu fil-livell lokali, jew attiviżmu individwali virali? Jew dawn kollha flimkien? Nixtiequ nisimgħu l-opinjoni tiegħek. Fi tmiem il-wirja, il-viżitaturi se jintalbu jagħtu l-opinjoni tagħhom dwar din l-attività interattiva relatata mal-4Rs: it-tnaqqis, l-użu mill-ġdid, ir-riċiklaġġ u t-tiswija.